Պեմզաշենում մոր և երկու երեխաների առանձնակի դաժանությամբ սպանության գործով կալանավորված 32-ամյա Վրույր Բարսեղյանը հաշվառված է եղել Արթիկի հիվանդանոցում՝ հոգեբույժի կաբինետում։ Այս մասին հայտնում է MediaHub.am-ի աղբյուրը։
Նա նշեց, որ հիվանդանոցն արդեն անհրաժեշտ բոլոր փաստաթղթերը տրամադրել է իրավապահ մարմիններին։ Եվ հենց դրան է հաջորդել Քննչական կոմիտեի տարածած հաղորդագրությունը, ըստ որի՝ Բարսեղյանը ունի «սուիցիդալ մտքերով անձի էմոցիոնալ խանգարում» հոգեկան հիվանդություն։
Հիշեցնենք, որ Վրույր Բարսեղյանը մեղադրվում է երեք հոդվածներով՝ առանձնակի դաժան սպանության, ավազակության և անչափահասի նկատմամբ սեքսուալ բնույթի բռնի գործողության համար։
MediaHub-ի հետ զրույցում Արթիկի բժշկական կենտրոնի ղեկավար Բաբիկ Մարտիրոսյանը հրաժարվեց որևէ անձնական տվյալ տրամադրել, սակայն հաստատեց մեր ունեցած տեղեկատվությունը՝ նշելով, որ, այո՛, ամբողջ տեղեկատվությունը տրամադրել է իրավապահներին:
